ಕಾಯರ್ ಮಾರ್ ಕಾಂತಕ್ಕೆಯ ಭೇಟಿ

ಗೌರಿ ಹೊಳೆಯ ಬದಿಯಿಂದಲೇ ಬಂದ ವೀರರು ಬಲಕ್ಕೆ ತಿರುಗಿದ ದಾರಿಯಿಂದ ಸುಮಾರು ಇಪ್ಪತ್ತು ಮಾರು ಹೋಗಿದ್ದರು. ಎದುರಿಂದ ಹೆಂಗಸೊಬ್ಬಳು ಬರುವುದು ಕಾಣಿಸಿತು. ಎದುರಿಗೆ ಬಂದವಳು ತನ್ನ ತಲೆ ಹೊರೆಯನ್ನು ನೆಲಕ್ಕಿಳಿಸಿ, ಮಕ್ಕಳೇ ನೀವು ಯಾರು? ಎಂದು ಪ್ರಶ್ನಿಸಿದಳು ನಾವು ಪಡುಮಲೆಯಿಂದ ಬಂದಿದ್ದೇವೆ. ನೇರೆಂಕಿ ಮಾಗಣೆಯ ಕಲ್ಲೆಂಬಿದೋಳದ ಅಕ್ಕನ ಮನೆಗೆ ಹೋಗುತ್ತಿದ್ದೇವೆ ಅಂದಾಗ ಕಾಂತಕ್ಕ ಮಕ್ಕಳೇ ಈ ದಾರಿ ಬಹಳ ಅಪಾಯದ್ದು. ಇದು ಮೂರು ರಾಜ್ಯದ ಗಡಿ ಪ್ರದೇಶ. ಇಲ್ಲಿ ಪಂಜದ ಬಲ್ಲಾಳನ ಗಡಿ ಕಾವಲಿನವರು ಕಾಯುತ್ತಿದ್ದಾರೆ. ಅಲಂದ ಅಡಕೆ=ಓಡಿಹೋಗತಂತೆ ತಡೆ ನೆಲದಲ್ಲಿ ನೆಲ ಉರುಳು=ನೆಲದಲ್ಲಿ ಹಾಕಿದ ಬಲೆ, ಮರಟ್ ಮರ ಒಲಿ=ಮರದ ಮೇಲೆ ಅಡಗಿ ಕಾಯಿವುದು. ಕಲ್ಲ್ಡ್ ಕಲ್ಲವೊಲಿ=ಪಾದೆ ಕಲ್ಲಿನ ಮರೆಯಲಿ ಕಾಯುವುದು, ಕೊಪ್ಪದ ಕೊರಗರು, ಓಣಿಯ ಮೋಗೇರರು, ಬೈಲ ಬಾಕುಡರು ರಾತ್ರಿ ಹಗಲು ಕಾಯುತ್ತಿದ್ದಾರೆ. ಕೈಗೆ ಸಿಕ್ಕಿದವರನ್ನು ಯಾರು? …..ಏನು..? ವಿಚಾರಿಸದೇ ಹೊಡೆದು ಬಡಿದು ಕಳುಹಿಸುವುದು ಇವರ ಪದ್ದತಿ ಎಂದವಳು ಬಂಟರನ್ನೆ ನೋಡಿ ಮಕ್ಕಳೆ ಈ ಗುಡ್ಡ ಹತ್ತಿ ಹೋಗುವ ನೇರ ದಾರಿಯಿಂದ ಹೋದರೆ ಅವರ ಕಾಟ ತಪ್ಪಬಹುದು. ಎಡಕ್ಕೆ ತಿರುಗಿ ಓಣಿ ಪ್ರದೇಶದಲ್ಲಿ ಮಾತ್ರ ಅಪಾಯ ಖಂಡಿತ ಎಂದಾಗ ಕೋಟಿ ಕೂಡಲೇ ಆಗಬಹುದು ಎಂದವನು ಕೋಟಿ ಮುಂದೆ ನಡೆದಾಗ ಚೆನ್ನಯ ಹಿಂಬಾಲಿಸಿದ. ಕಾಂತಕ್ಕ ತಲೆ ಹೊರೆ ಹೊತ್ತು ಅವಳದಾರಿ ಹಿಡಿದಳು. ಬಂಟರು ಅಪಾಯದ ದಾರಿಯೇ ಹಿಡಿದು ಓಣಿ ಪ್ರದೇಶ ಮುಟ್ಟಿದಾಗ….. ಅಲ್ಲೇ ನಿಲ್ಲಿ ಎಂಬ ಮಾತು ಕೇಳಿಸಿತು. ನೋಡಿದಾಗ ನಾಲ್ಕು ಕಡೆಗಳಿಂದಲೂ ಕತ್ತಿ ದೊಣ್ಣೆ ಹಿಡಿದ ಕಾವಲುಗಾರಾರು ಓಡಿ ಬರುವುದು ಕಂಡಿತು. ಚೆನ್ನಯ ಕೂಡಲೇ ಕತ್ತಿ ಹಿಡಿದು ಮೂರು ಸುತ್ತು ಬೀಸಿದಾಗ ನೆಲ್ಲಿ ಮರದ ಗೆಲ್ಲುಗಳು ತುಂಡು ತುಂಡಾಗಿ ಬಿದ್ದವು. ಇದನ್ನು ನೋಡಿದ ಕವಲುಗಾರರು ಭಯದಿಂದ ಅಲ್ಲೇ ನಿಂತುಬಿಟ್ಟರು. ಈ ಅಪೂರ್ವ ಸಹೋದರ ಬಂಟರನ್ನು ಕಂಡು ಭಯದಿಂದ ಕಾರ್ಯಚರಣೆ ಮಾಡುವುದನ್ನು ಬಿಟ್ಟು ತಪ್ಪಾಯಿತೆಂದು ಕ್ಷಮೆ ಬೇಡಿದರು. ಮುಂದೆ ಬಂದ ಕೋಟಿ ಶರಣಾದವರನ್ನು ಕ್ಷಮಿಸಿ – ನಿಮ್ಮ ಪುಂಡಾಟಿಕೆ ನಮಗೆ ಗೊತ್ತು. ಇನ್ನೂ ಯಾವತ್ತು ಹೀಗೆ ಮಾಡಬೇಡಿ ಎಂದು ಬುದ್ಧಿ ಹೇಳಿದನು. ಮುಂದೆ ಅವರಿಂದಲೆ ಕಲ್ಲೆಂಬಿ ದೋಳದ ದಾರಿ ಕೇಳಿ ಬೆಳ್ಳಾರೆಗೆ ಹೋಗುವ ಮಾರ್ಗಬಿಟ್ಟು ಬಡಗುದಿಕ್ಕಿರುವ ದಾರಿಹಿಡಿದು ನಡೆದರು.